Хэмнэл урлахуй

Язгуур урлагыг орчин үеийн бүжгийн урлагтай хослуулсан. Мөн бүжиг, хөгжим, гэрэл, видео графикийг хослуулан хэмнэлийг урласан энэ оройн үзүүлбэр үнэхээр тансаг болж өнгөрлөө.
Гоцлол бүжигчин Т. Содгэрэлийн уран бүтээлийн үдэшлэг дангаараа бус олон олон уран бүтээлчдийн уран бүтээлийн үдэшлэг санагдлаа. Ятгачин МУГЖ, Мөнх-Эрдэнийн Санахуй, Эмоци аянууд ямар гоё уянгалаг байсан бэ.
Бүжгийн хөдөлгөөндөө малын тамга /хас тамга, чандмань тамга г. м/ оруулж өгсөн нь их сонирхол татлаа.

Харин шагшуурга зэргийг понаграммдаа дууг нь оруулах биш бодитоор дуугаргаж бүжсэн бол илүү гоё амьд болох байсан санагдлаа.
Энэ оройн бас нэг онцгой зүйл нь японы экибана урлагийн уран бүтээлч Г. Бурмаагийн бүтээл байлаа.

Энэ оройн сайхан тоглолтыг зохион байгуулж оролцсон бүх уран бүтээлчдэд баяр хүргэе. Виртүс академийн брошурын зургаас ашиглалаа.

Хөхөө Намжил дуурь

УДБЭТ-ыг найрал дуучид, балетын жүжигчид оролцон симфони найрал хөгжим хөгжимдсөн Л. Мөрдоржийн "Хөхөө Намжил" 5 үзэгдэлт дуурийг үзэж сонирхлоо.  Удирдаач Ц. Мөнхболд /МУУГЗ/, найруулагч А. Дашпэлжээ /МУАЖ/, зураач Г. Ганбаатар /МУУГЗ/ нар ажиллаж гол дүрүүдэд:
Хөхөө Намжил М. Даваадорж
Уянга                 Б. Энхнаран /СТА/
Алтайн дагина  Ж. Энхмаа
Галдан               Б. Шинэбаяр
Түшмэл              Э. Бумхүү /СТА/
Хувилгаан         О. Хүрэлбаатар /СТА/
Их хатан            Б. Эрдэнэтуяа /МУГЖ/
Дуганч               Г. Шижирболд /СТА/ нар дууллаа.

Монголын дуурь болохоор орчин нөхцөл, тайз засал зэрэг нь сэтгэлд ойр, үлгэрийг хэрхэн тайзан дээр амилуулж болохыг харуулсан маш сайхан санагдлаа. Дөрөө, шагайгаар суудал зассан нь өвөрмөц сонин шийдэл санагдсан.
Гадаад дуурь үзэхэд бид хэлийг нь ойлгохгүйгээс дутуу ойлгодог байх. Харин монгол хэл дээрээ сонсох нь сэтгэлд ойр байсан.
ДБЭТ-т 20 гаруй монгол дуурь тавигдсан байна. Бүгдийг нь үзэх зорилго тавилаа.

Баяр хөөр дүүрэн балчир нас

Сүүлийн үед хүүхдийг хүмүүжүүлэх Монтессори арга ухаан гэж их сонсогддог болсон.
Монгол дах Монтессори холбооны үүсгэн байгуулагч, тэргүүн Цүкүба их сургуульд нэгэн үе хамт суралцаж байсан найз Н. Цолмон маань энэ номыг албан ёсны эрхтэйгээр орчуулан гаргажээ. Мөн Монголд анх удаа Монтессори багш бэлтгэх сургалтыг явуулахаар завгүй ажиллаж байгаа юм байна.
Цолмондоо баяр хүргэж, цаашдын ажилд нь амжилт хүсье. Найзынхаа номыг уншаад мундаг хүүхдүүд хүмүүжүүлнээ.

高橋研OB会 (OB kai)

Өнөөдөр Цүкүба их сургуулийн Эй сангаас нэг мэдээ хүлээн авлаа. Манай багш Такахаши Масафүми гуай энэ жилийн төгсөлтөө хийгээд гавъяаныхаа амралтанд гарах гэж байгаа гэнэ.
Тэгээд энэ оны 3 сарын 23 өдөр Такахаши багшийн үе үеийн төгсөгчдийн OB会 (OB kai) болно гэнэ.
Цүкүбагийн их сургуульд суралцаж төгссөн 2006-2009 он бол миний амьдралын хамгийн дурсгалтай сайхан мөчүүдийн нэг яах аргагүй мөн билээ. Манай багш үнэхээр намайг чирч явсаар л төгсгөсөн дөө. Муу сурдаг оюутан байлаа. Багшдаа үргэлж баярлаж явдаг.
OB会 (OB kai) гэх ойлголтын тухай тайлбарлавал, ОВ гэдэг нь Old boy буюу хөгшин хүү гэсэн утга 会 (kai) гэдэг нь уулзалт гэсэн утгыг илэрхийлдэг. Ерөнхийдөө бол хууччуудын уулзалт гэсэн үг. Японд сургуульд хамт суралцаж байсан, хамт ажиллаж байсан хүмүүс уулзаж ОБ кай хийх нь их байдаг. Нийгмийнх нь нэг соёл юм даа. Тэгээд нэг уулзсаных хоолонд ороод жоохон идэж, ууж байгаад караокэ ороод 二次会 (nijikai)、三次会 (sanjikai) гээд явж өгнө дөө. Япончууд маш зарчимч, албархуу юм шиг мөртлөө, ууж идээд явбал бүгд маш яриа хөөрөөтэй, хөгжиж чаддаг хүмүүс шүү.

Ирээдүй байхгүй

Ойрын хэдэн өдөр ажлын мал шиг л ажиллалаа. Саяхандаа нэг сонссон үг одоо хүртэл бодогдоод энэ тухай блогтоо бичмээр санагдлаа. Энэ үг бол, ИРЭЭДҮЙ БАЙХГҮЙ.

Амны билэггүй муухай үг гэж битгий бодоорой. Энэ үгний гол санаа нь өчигдөр нэгэнт өнгөрсөн та буцааж чадахгүй, харин маргааш болох эсэхийг та мэдэхгүй тийм учраас өнөөдрөөрөө амьдар гэсэн үг гэж би ойлгож байгаа. Тэгэхдээ ирээдүй байхгүй юм чинь гээд маргаашийн төлөө өнөөдөр хийх зүйлээ орхих нь байж боломгүй зүйл. Харин өнөөдөрөөр амьдрахдаа маргааш ирнэ, нөгөөдөр ирнэ гэж найдаж, 5 жилийн дараах мөрөөдөл, 10 жилийн дараах мөрөөдөлөө биелүүлэхийн төлөө амьдрах нь чухал. 

Маргаашийн мөрөөдлийн төлөө өнөөдөр хийхийгээ хий, тэгэхдээ баяр баясал, амьдралын сайн сайхан бүхнийг хором ч алдалгүй, марталгүй, алгасалгүй, орхилгүй амьдрах хэрэгтэй.

"Өчигдрөөс суралцаж,

Өнөөдөрөөр амьдарч,

Маргаашийн төлөө найд"

Альберт Эйнштейн

Нурууны дасгал

Хужиртын рашаан сувилалд хийдэг байсан нурууны дасгалаа дараа санах, үргэлжлүүлэн хийх зорилгоор бичлээ. Эрүүл мэндээ боддог хэн бүхэн хийгээрэй.
Эрүүл явахад мянган лан.
Эрүүл биед саруул ухаан оршино.

Нурууны дасгал тул хэмтээ, дээшээ харах байрлалаар ихэнхи дасгал хийгдэнэ.

1. Гараа биеийн дагуу доош нь унжуулаад дээшаэ харж хэвтэнэ. Гараа өргөн толгойн дээш газарт хүргэн 10 удаа
2. Гараа биеийн дагуу доошоо унжуулаад гарын бугуй, хөлийн шагайгаар дээш доош хөдөлгөн 20 удаа 3. Гараа биеийн дагуу доошоо унжуулан хэвтэж бэлтгэх байдлаас нэг гар, нэг хөлийг сөөлөлөн өргөж буулган 20 удаа 4. Гараа биеийн дагуу доошоо унжуулан хэвтэж бэлтгэх байдлаас 2 хөл, 2 гараа зэрэг өргөж буулган 10 удаа. Хөл 45 градусаар өргөнө. 5. Гараа биеийн дагуу доошоо унжуулан хэвтэж бэлтгэх байдлаас гараа ташаандаа авч дугуй жиих хөдөлгөөн хийн 20 удаа 6. Баруун тийш харж хэвтэн, баруун гараараа толгойгоо түшиж, зүүн гараа ташаандаа авч дугуй жийх хөдөлгөөн 20 удаа 7. Зүүн тийш харж хэвтэн, зүүн гараараа толгойгоо түшиж, баруун гараа ташаандаа авч дугуй жийх хөдөлгөөн 20 удаа 8. Дээшээ харж хэвтэн гараа нуруун доороо ивэж 2 хөлөө 45 градус дээш өргөн, 5 секунд бариад 10 удаа 9. Доошоо харж хэвтэн 2 гараа дээшээ мөргөлийн байрлалд авч толгой, гар, цээжийг дээш өргөн 10 удаа. Хөл газраас хөндийрүүлэхгүй. 10. Өмнөх байрлалаас хөлөө давхар өргөн сэлэх хөдөлгөөн 10 удаа (дүүжин даажин) 11. 4 хөллөн гар, хөлөө сөөлжлөн өргөж 20 удаа 12. 4 хөллөн толгойгоо цээжиндээ нааж, нуруугаа гүдийлгэж, толгойгоо өргөж нуруугаа хотолгойн муур хөдөлгөөн 20 удаа 13. Гудасны доор хэсэгт зогсон мөргөх. 4 тоон дээр доош сууж гараа нурууны ард аван нуруугаа хотойлгоно 5-7 тоот дээр урагш сунан мөргөнө. 8-10 тоон дээр өвдөг дээрээ тулан босоод нуруугаа доош даран цээжээ тэнийлгэн өгнө. Йогийн Puppy pose шүү. 11 тоон дээр өвдөгөө нугалан сууж гараа нурууны ард аван нуруугаа хотойлгоно. 12 тоон дээр босож зогсоно. 10 удаа мөргөөрэй.
14. Босоо байрлалаас өлмий дээрээ зогсон гараа толгойн дээр алгаа ташна. Буцааж буун эхний хөдөлгөөнийг давтах маягаар 5 удаа алгаа ташна.
Ингээд болоо.

Их яруу найрагч Дашдоржийн Нацагдоржийн шүлэгээр өндөрлөе.

Жаргалан
Жаргалан жаргалан жаргалан
Энэ ертөнцийн түмэн жаргалан
Түүний дотроос чухам жаргалан
Эрүүл энхийн нэгэн жаргалан

Өвлийн өдөр

Жавар тас хийсэн, дөрвөн есийн өвлийн хүйтэн өдөр, айл бүрийн яндангаас гарсан утааг харахад сэтгэлд нэг л дулаахан, хөөрхөн мэдрэмж төрөх. 

Хужиртийн домог

Өвөрхангай аймгийн нутагт орших Хужирт рашаан сувилалд хэд хоног сайхан сувилуулж амарч байна. Уг сувилалыг 1939 онд ашиглалтанд оруулсан юм байна. Зоогийн газар нь нэг удаадаа 320 хүнд үйлчилдэг, зундаа оргил үедээ 3 ээлжээр хооллодог гэнэ. Сүүлийн үед сувилалын газар гэхээр хөгшин настай хүн ирдэг гэсэн ойлголт үгүй болжээ. Залуучууд, сургуулийн амралт таарсан болохоор хүүхдүүд, гэр бүлээрээ амарч байгаа амрагчид олон байна. Хужиртийн халуун рашаан, шавар нь үе мөчний өвчин, архаг ядаргаа, эмэгтэйчүүд зэрэг олон өвчинг эдгээж илааршуулдаг шидтэй юм байна. Үр тогтохгүй эмэгтэйчүүд энд ирж шавар тавиулж үр хүүхэдтэй болсон нь олон гэнэ. Ийм эмэгтэйчүүд 4 сар тутамдаа ирж шавар тавиулбал их сайн гэнэ. "Шаварны хүүхдүүд" их бий гэнэ шүү.
Хужирт рашаан сувилал, Элма хужирт, Ананд хужирт, Сэмжид хужирт гээд рашаан сувилалын газрууд рашаан, шавараа тойрон байрладаг юм байна.
Бие сэтгэлийн амгалан, рашаан ус, шаварандаа ороод чадвал жилдээ нэг ирээд амархад үнэхээр сайхан юм байна шүү.
Уг рашаан, шаварыг анх мэдэж нээсэн домгийг өгүүлбэл, Шунхлай нэртэй нутгийн өвгөн уулийн энгэрт алсын барааг ширтэн суухдаа хөлөн доголсон нэгэн буга шаварт зогсон байхыг ажиглажээ. 7 хоног орчим болсоны дараа буга эрүүл болсоныг харж рашааны ид шидийг мэдсэн юм байна.
Нутгийн олон Шунхлай өвгөний нэрээр хужиртийн хайрханыг нэрлэн, энгэрт нь Шунхдлай өвгөн алсыг ширтэн суугаа хөшөө, Шунхлай хайрханы дээр Буган хөшөө босгосон байна.
Рашаанд ирсэн хүн доорхи үгийг хэлэн, өвчинөө илааршуулахыг гуйж рашаан, шавартаа орж эхэлдэг гэнэ.

Зэ, Алс газраас зүдэж ирлээ
Агт морин эцэж ирлээ
Рашаан хүртэхээр зорьж ирлээ
Шаварт орохоор хүсч ирлээ
Өвчин эмгэгт минь эм болж хайрла аа!
Үжирсэн биеийг минь эдгээн засаж хайрла аа!